ကျွန်မနဲ့ ဗုဒ္ဓဂယာခရီးစဉ် ( ၄ )

ဘုရင်မ ဘက်ဂုမမာတာ နန်းတော် ( တပ်ခ်ျမဟာ)

အချာဟဲ.. (ကုလားကားတွေမှာ လက်အုပ်လေးချီပြီး နှုတ်ခွန်းဆက်ကြတဲ့ပုံလေးကို မြင်ယောင်လိုက်ကြပါနော်။) :)

ကျွန်မတို့ဘုရားဖူးအဖွဲ့ဟာ ဖေဖော်ဝါရီလ ၁၄ရက်နေ့ညမှာတော့ မြတ်စွာဘုရား ဓမ္မစင်္ကြာ တရားဦးဟောကြားတော်မူခဲ့သော မိဂဒါဝုန်သို့ ရောက်ရှိခဲ့ကြပြီး မိဂဒါဝုန်မြန်မာဘုန်းတော်ကြီးကျောင်းမှာ တည်းခိုခဲ့ကြပါတယ်ရှင်။မိဂဒါဝုန်ကျောင်းရောက်တဲ့အခါ အစ်မနန္ဒာဝင်းမှ ၄ ယောက်ခန်း အိပ်ခန်းတွေအသီးသီး စီစဉ်နေရာချထားပြီးတာနဲ့ ညနေစာသုံးဆောင်ကြဘို့ စီစဉ်ပေးတာကြောင့် ထမင်းစားဆောင်ဝင်ကာ အသင့်စီစဉ်ထားပေးတဲ့ ညစာထမင်းဟင်းတွေကို မြိန်ယှက်စွာနဲ့ စားသုံးဖြစ်ခဲ့ကြပါတယ်။

ဖေဖော်ဝါရီ ၁၅ ရက် မနက်ပိုင်းမှာ ဆရာတော်ဦးဆောင်တဲ့ ကျွန်မတို့ဘုရားဖူးအဖွဲ့ဟာ မြတ်စွာဘုရား ဓမ္မစကြာင်္တရား ဟောကြားတော်မူခဲ့တဲ့ မိဂဒါဝုန်ကျောင်းတော်ကြီးသို့ ဆရာတော်ချပေးသော ဘုရားစာကို သံပြိုင်ရွတ်ဆိုပူဇော်ကာ သွားရောက်ကြည်ညိုကုသိုလ်များယူကြပြီး ဓမ္မစကြာင်္တရားတော်ကို ရွတ်ဖတ်ပူဇော်ခဲ့ကြသလို ညနေပိုင်းမှာတော့ မိနစ် ၃၀လောက် တရားရှုမှတ်နိုင်ခဲ့ကြတာကြောင့် ကျွန်မတို့အတွက် တန်ဘိုးရှိတဲ့အချိန်များပဲ ဖြစ်ခဲ့ပါတယ်။

ဘုရားပစ္စေကဗုဒ္ဓါ ရဟန္တာတို့၏ ကောင်းကင်သို့တက်ရာ ၊ကောင်းကင်မှဆင်းသက်ရာဖြစ်သော ဤမိဂဒါဝုန်တောသည် ဘုရားအဆူဆူတို့၏ မစွန့်အပ်သော အ၀ိဇဟိတလေးဌာနတို့တွင် တစ်ဌာနအပါအ၀င်ဖြစ်ပြီး ၊သံဝေဇနိယ လေးဌာနတို့တွင်လည်း တစ်ဌာနဖြစ်ပါသည်။မြတ်စွာဘုရားသည် လေးအသင်္ချေနှင့် ကမ္ဘာတစ်သိန်း ကာလပတ်လုံး ကျင့်ကြံကြိုးစားအားထုတ်၍ ရရှိလာသော အမြင့်ဆုံးအသိတရားများကို ဤမိဂဒါဝုန်တောတွင် စတင်ဖော်ထုတ်ဟောကြားတော်မူခဲ့ပါသည်။မြတ်ဗုဒ္ဓသည် ဓမ္မစကြာတရားဦးကို ဟောကြားတော်မူပြီး၍ ပထမ၀ါကို ကပ်ဆိုတော်မူပြီးနောက် မဇ္ဈိမဒေသ အနှံ့အပြားသို့ ဗုဒ္ဓသာသနာတော်ကြီးရောက်ရှိပြန့်ပွားရန် သာသနာပြုရဟန်းပုဂ္ဂိုလ်ကြီးများကို စတင်မွေးထုတ်ပေးသောနေရာသည်လည်း မိဂဒါဝုန်မြေသာ ဖြစ်ပါသည်။သံဃာအဖွဲ့အစည်းကြီး စတင်ပေါ်ပေါက်လာအောင် မွေးထုတ်ပေးခဲ့သော ဤမိဂဒါဝုန်တောကို မဟာပရိနိဗ္ဗာနသုတ်တော်၌ ဗုဒ္ဓဘာသာဝင်တိုင်း၏ မြင့်မြတ်သောနယ်မြေဖြစ်ခြင်းကြောင့် ဘုရားဖူးသွားရောက်သင့်သော နေရာဌာနတစ်ခုအဖြစ် အထူးပြဆိုထားခဲ့ပါသည်။

မိဂဒါဝုန်မှာ အမှတ်တရ.

ဤဘဒ္ဒကမ္ဘာကြီး၌ ဘုရားငါးဆူပွင့်တော်မူမည်ဖြစ်ရာ ဂေါတမရှင်တော်ဗုဒ္ဓသည် လေးဆူမြောက်ပွင့်တော်မူခဲ့သော ဘုရားရှင်ဖြစ်သည်။ဘုရားရှင်တိုင်း ဤနေရာ၌ ဓမ္မစကြာဒေသနာတော်ကြီးကို ပဉ္စ၀ဂ္ဂီငါးဦးနှင့် နတ်ဗြဟ္မာတို့အား ဟောကြားတော်မူခဲ့သောကြောင့် စကြာဝဠာအပေါင်း တိုက်တစ်သောင်းမှ နတ်ဗြဟ္မာများလည်း ရေတွက်မကုန်နိုင်အောင် ဤနေရာ၌ အသိတရား အကျွတ်တရားများရရှိသွားကြသောနေရာပင်ဖြစ်ပါသည်။ဤနေရာတွင် သံဃာအဖွဲ့အစည်းကြီး လေးကြိမ်တိုင်တိုင်ပေါ်ပေါက်ခဲ့ပြီး နောင်အချိန်၌ ပွင့်လတံ္တ့သော အရိမေတ္တယျဘုရားရှင်သည်လည်း ဗာရာဏသီအမည်ရှိသော ယခုမြို့တော်နေရာ၌ ကေတုမတီမြို့အမည်တွင်ကာ မွေးဖွားလာပြီး ဤမိဂဒါဝုန်တော၌ပင် တရားစည်ကြီးတီးခတ်လိမ့်ဦးမည်ဖြစ်ကြောင်း ဆရာတော်မှဟောပြတော်မူခဲ့ပါသည်။

ဤမိဂဒါဝုန်တော၌ သုတ္တန်အများအပြားဟောကြားခဲ့သောကြောင့် မြတ်ဗုဒ္ဓသည်မကြာခဏလာရောက် သီတင်းသုံးခဲ့သည်မှာ မလွဲနိုင်ပါ။နန္ဒိယသူကြွယ် ဆောက်လုပ်လှူဒါန်းခဲ့သောကျောင်းတော်ကြီးသည်လည်း ဤမိဂဒါဝုန်တော၌ဖြစ်ပြီး သူတို့ဇနီးမောင်နှံနှစ်ဦး၏ ဖြစ်ရပ်ဆန်းများကို သံဝေဂယူဖွယ်ရာတွေ့ရှိရပါသည်။ယောကျာင်္းဖြစ်သူသည် သာသနာတော်ကို အလွန်ကြည်ညို၍ မိန်းမဖြစ်သူကာ သာသနာတော်ကို ကဲ့ရဲ့ရှုတ်ချသောသူ ဖြစ်ခဲ့သည်။ထို့ကြောင့် မသေခင်ကပင် ယောကျာင်္းဖြစ်သူအား နတ်သမီးများက တပျော်တပါးနှင့် တမ်းတနေကြပြီး မိန်းမဖြစ်သူကို ငရဲပြည်မှ ငရဲသားများက စောင့်ကြိုခံရသူ ဖြစ်ခဲ့ရပေသည်။

ဘူမိနက်သန် နေရာမှန်ဖြစ်သော ဤမိဂဒါဝုန်တောတွင် ပညာအရာ၌ ဧတဒက်ရ အရှင်သာရိပုတ္တရာကိုယ်တော်မြတ်ကြီး နိရောဓသမာပတ်ဝင်စားနေစဉ် ကိုယ်တော်မြတ်ကြီး၏ ဦးခေါင်းကို လက်သီးဖြင့်ထိုးခဲ့သော နန္ဒကဘီလူးမိုက်ကို မဟာပထ၀ီမြေကြီး မျိုကြိတ်ခံခဲ့ရ၍ သေပွဲဆင်ခဲ့ရသည်မှာလည်း ဤမိဂဒါဝုန်တော၌ ဖြစ်ခဲ့ပေသည်။

ကျွန်မတို့ဘုရားဖူးအဖွဲ့သည် မိဂဒါဝုန်၌ မြတ်ဗုဒ္ဓအား ပဉ္စ၀ဂ္ဂီငါးဦးတို့ ခရီးဦးကြိုပြုခဲ့သော ချောက်ခဏ္ဍီစေတီတော် ၊ဓမ္မစကြာတရားဟောကြားရာ ဓမ္မရာဇိကစေတီတော် ၊အနတ္တ လက္ခဏာသုတ် ဟောတော်မူခဲ့သည့် ဓမ္မေခစေတီတော် ၊မြတ်စွာဘုရားနှင့် ပဉ္စ၀ဂ္ဂီငါးဦးတို့ ပထမဆုံးဝါကပ်တော်မူခဲ့ကြသော ကျောင်းဒကာကြီးနန္ဒိယ ဆောက်လုပ်လှူဒါန်းခဲ့သော နန္ဒိယကျောင်းတော်ရာ နေရာများသို့ ဆရာတော်မှ လိုက်ပါပို့ဆောင်ပေးခဲ့ပါသည်။

၁၅ ရက်နေ့ ညပိုင်းမှာတော့ မိဂဒါဝုန်မြန်မာဘုန်းကြီးကျောင်းမှ ကျောင်းထိုင်ဆရာတော်ကြီးအား မိမိတို့မြန်မာပြည်မှသယ်ဆောင်လာကြသော လှူဖွယ်ပစ္စည်းများနှင့်အတူ အလှူငွေများကို မိမိတို့ တတ်နိုင်သလောက် ပါဝင်လှူဒါန်းမှုများပြုကာ လက်အုပ်ချီမိုးရှစ်ခိုးကန်တော့၍ သာဓုခေါ်ဆိုပြီး အမျှပေးဝေခဲ့ကြပါတယ်။မြန်မာကျောင်းတိုင်းလိုလိုမှာ အလှူငွေ ဒေါ်လာ ၅၀ နှင့်အထက် ပါဝင်လှူဒါန်းပါက ဂုဏ်ပြုမှတ်တမ်းလွှာလေးများကို လက်ခံရရှိနိုင်ကြပါတယ်ရှင်။သွားလေရာ ခရီးစဉ်တလျှောက်မှာ တည်းခိုစရာ မြန်မာဘုန်းကြီးကျောင်းတချို့ကို အဆင်ပြေစွာတွေ့ရှိ နားခိုခွင့်ရတဲ့အခါမှာ စတင်လှူဒါန်းမှုပြုခဲ့ကြပါသော အလှူရှင်များကို အားကျစွာနဲ့ ကျေးဇူးအလွန်တင်မိသလို၊ မိမိသည်လည်း သူတို့လို အများကြီး မလှူနိုင်သေးရင်တောင်မှ မိမိတတ်နိုင်သလောက်ပါဝင်လှူဒါန်း ကုသိုလ်ယူကာ ဗုဒ္ဓဂယာမြေမြတ်မဟာမှာ ကျွန်မတို့ဗုဒ္ဓဘာသာသာသနာကြီး ရောင်ဝါနေသို့လင်းနိုင်စေရန် သာသနာပြုနေကြပါသော ဆရာတော်ကြီးများနဲ့အတူ သံဃာတော်များ၏ ဝေယျာဝစ္ဆများကို အနီးကပ်လုပ်ဆောင်မပေးနိုင်ကြပါသော်လည်း မိမိတို့ တတ်နိုင်သည့်ဘက်မှ တတတ်တအားပါဝင်လှူဒါန်းမှု ပြုနိုင်ကြပါက ဗုဒ္ဓဘာသာ သာသနာသည် ရောင်ဝါနေသို့လင်းရုံမျှမကပါပဲ ရောင်ဝါနေထက်ပင်လင်းနိုင်ကြောင်း ယုံကြည်မိပါသဖြင့် ကျွန်မသည်လည်း ဗုဒ္ဓဘာသာ သာသနာအကျိုးအတွက် မိမိတတ်နိုင်သည့်ဘက်မှ သဲတစ်ပွင့်ပမာဏလောက်ပါဝင်ကာ ကုသိုလ်ဒါနပြုကြရေးအတွက် အလှူရှင်များကို တိုက်တွန်းနှိုးဆော်နေခဲ့ခြင်းပဲ ဖြစ်ပါတယ်ရှင်။

မနေ့က ဆေးခန်းမှာ ကျွန်မတို့ဗုဒ္ဓဂယာဘုရားဖူးသွားတဲ့ ဘုရားဖူးVCD ခွေလေးဖွင့်ထားပေးတော့ ကြည့်နေတဲ့ ဧည့်သည်တစ်ဦးက "ဗုဒ္ဓဂယာဆိုတာ တစ်နေရာ တစ်မြို့လို့ပဲ့ထင်နေခဲ့တာ နေရာတွေအများကြီးသွားရတာပဲနော်"လို့ဆိုလာတဲ့အခါ ကျွန်မကလည်းဟုတ်ပါကြောင်း ကျွန်မလည်း ဗုဒ္ဓဂယာမရောက်ဖူးခင်က ဗုဒ္ဓဂယာဆိုတာ တစ်နေရာတစ်မြို့တည်းမှာပဲ ဘုရားဖူးလည်ပတ်ရတာလို့ထင်ထားခဲ့တာ ရောက်သွားပြီးမှ မြတ်စွာဘုရား ၀ါဆိုသီတင်းသုံးတဲ့နေရာ ၊ မြတ်စွာဘုရား တရားဟောတဲ့နေရာ ၊မြတ်စွာဘုရား မွေးဖွားရာနေရာ ၊မြတ်စွာဘုရား ပရိနိဗ္ဗာန်စံရာနေရာ စသည်စသည်ဖြင့် နေရာများစွာ မြို့များစွာကို ကျွန်မတို့ဘုရားဖူးတွေက ကားတွေနဲ့ခရီးဆက်ကာ လည်ပတ်ဖူးမျှော် ကုသိုလ်ယူခဲ့ကြရပါကြောင်း ပြောပြတော့ အခုမှပဲသေခြာသိရတော့တယ်ဆိုပြီး အံ့သြစွာနဲ့ သိရှိသွားခဲ့ပါတယ်။တကယ်တော့ ကျွန်မတို့ဆေးခန်းမှာ သွားလာပြတဲ့အန်တီကိုစောင့်ပေးရင်း ဧည့်ခံမှာ ဘုရားဖူးခွေကို အတူကြည့်ကာ ကျွန်မကိုမေးမြန်းသူကတော့ ဗုဒ္ဓဘာသာဝင်မဟုတ်ပါပဲ ဦးဥာဏ်ရဲ့သူငယ်ချင်း မူစလင်ဘာသာဝင် သွားဆရာဝန်တစ်ဦးဖြစ်ပါတယ်။သူက တခြားဘာသာရေးတွေကိုလည်း စိတ်ဝင်စားသူဖြစ်တာကြောင့် ကျွန်မကို သူသိလိုတာတွေ မေးမြန်းလာတဲ့အခါ ကျွန်မမှာသူမေးသမျှ ပြန်မဖြေနိုင်ပါပဲ သူက ကျွန်မထက် ဗုဒ္ဓ၀င်ကို ပိုသိနေလို့ သူ့ကိုတော်လိုက်တာလို့ ချီးမွမ်းပြီး ကိုယ့်ကိုကိုယ်တောင်ရှက်မိပါသေးတယ်။

ဟုတ်ပါတယ် ကျွန်မလည်း ဗုဒ္ဓဂယာမရောက်ခင်က ဗုဒ္ဓဂယာဘုရားဖူးခရီးစဉ်ဆိုတာ လေယာဉ်လေးနဲ့သွား ဗုဒ္ဓဂယာရောက် ၊ဗုဒ္ဓဂယာရောက်ရင် ဆရာတော်တွေမှ တရားဟောပေးကြတာကို တရားနားယူရင်း အဲဒီကျောင်းမှာပဲတည်းခိုပြီး တရားစခန်းလေးဝင် အနီးအနားလည်ပတ်၊ ၂ပတ်ပြည့်တော့ မြန်မာပြည်ပြန် အဲလိုပဲထင်ထားခဲ့တာပါ။ တကယ်တော့ ဖေဖော်ဝါရီလ ၁၂ ရက်နေ့မှာ ရန်ကုန်-ဗုဒ္ဓဂယာ ၂နာရီကြာလေယာဉ်ခရီးနဲ့ ဗုဒ္ဓဂယာမြို့ကိုရောက်ပြီး ဗုဒ္ဓဂယာ ၊မဟာဗောဓိ ဓမ္မရိပ်သာကျောင်းကြီးမှာ ၂ ညအိပ်ပြီးသကာလ ဖေဖော်ဝါရီလ ၁၄ ရက်နေ့မှစပြီး ဗုဒ္ဓဂယာ ၊ ရာဇဂြိုလ်ပြည် ၊ မိဂဒါဝုန် ၊ သင်္ကာသ ၊ တပ်မဟာ ၊နယူးဒေလီ ၊ သာဝတ္တိ ၊နီပေါ၊ လုမ္ဗနီ ၊ကုသိနာရုံ များသို့ ကားများဖြင့် ခရီးရှည်ထွက်ကာ ၂၄ ရက်နေ့ညမှာ ဗုဒ္ဓဂယာမြို့သို့ပြန်ရောက်ခဲ့တဲ့ ခရီးဟာ မိုင်ပေါင်း ၂၀၀၀ ကျော်ခရီးစဉ်ဖြစ်ခဲ့ပါတယ်ရှင်။

သွားရသောခရီးများမှာ တစ်နေရာနှင့်တစ်နေရာ အနည်းငယ်ကွာဝေးသော ခရီးများရှိသလို ၊မနက် ၃ နာရီခွဲလောက်မှာခရီးစထွက်ကြပြီး လမ်းတလျှောက် ၀င်လည်စရာရှိသော နေရာများသို့ ဆရာတော်မှ လိုက်ပါရှင်းပြ ၀င်လည်ကြကာ ညမိုးချုပ်မှ တည်းခိုရာနေရာသို့ ရောက်ရှိကြပါသောကြောင့် တစ်နေ့တစ်နေ့ခရီးဆက်နေပါသော်လည်း မြန်မာပြည်တွင် ကျန်းမာရေးမကောင်းနေသောကျွန်မမှာ ဘုရားတန်ခိုးတော်ကြောင့် ခရီးပမ်းခြင်းမရှိပါပဲ သွက်လက်ပျော်ရွှင်ကာ စိတ်ဓါတ်တက်ကြွနေပါသောအခါ အစ်မနန္ဒာက အံသြ၀မ်းသာစွာနဲ့ "၀ါဝါကိုမလာခင်ကစိတ်ပူခဲ့ရတာ အခုတော့ အဆင်ပြေနေတာပဲ"လို့ မကြာခဏပဲပြောရှာပါတယ်။ဆရာတော်ကလည်း "ဒကာမကြီးဝါ၀ါ အဆင်ပြေရဲ့လား..ဒီရောက်တော့ ဘုရားဖူးချင်တဲ့စိတ်တန်ခိုးနဲ့ မကျန်းမာသူတွေ ကျန်းမာသွားကြတယ်"လို့ဆရာတော်မှ မိန့်တော်မူပါတယ်။

၁၄ ရက်နေ့နဲ့ ၁၅ ရက်နေ့ ၂ ညတာ မိဂဒါဝုန်မြန်မာကျောင်းမှာ တည်းခိုကြပြီး ၁၆ ရက်နေ့ မနက် ၄ နာရီလောက်မှာ မိဂဒါဝုန်ဘုန်းကြီးကျောင်းကနေ ပြန်လည်ထွက်ခွါလာခဲ့ကြပါတယ်။ကျွန်မ ဗုဒ္ဓဂယာရောက်တော့ စင်္ကာပူမှညီမလေးတစ်ဦးကလည်း သူတို့မိသားစုလည်း ဗုဒ္ဓဂယာသွားကြမှာဖြစ်ပါကြောင်း ၊ကျွန်မအတွက်သွားရေးလာရေးအဆင်မပြေပါက သူတို့မိသားစုကားနဲ့ အတူလိုက်ပါဘို့ ခေါ်ခဲ့တာမို့ ၀မ်းသာစွာနဲ့ကျေးဇူးတင်မိသလို ကျွန်မအနေနဲ့လည်း အစ်မနန္ဒာရဲ့ အစစအရာရာပြီးပြည့်စုံနေတဲ့ စီစဉ်ဆောင်ရွက်မှုကြောင့် ဘာမှလိုလေသေးမရှိအောင် ပြီးပြည့်ခဲ့တာမို့ ညီမလေးကို အဆင်ပြေပါကြောင်း ၊တည်းခိုကြမယ့်နေရာမတူကြတာကြောင့် အဆင်ပြေမယ်ဆိုရင်တော့ တစ်နေရာမှာတွေ့ဆုံကြဘို့ မကြာခဏဖုန်းနဲ့ဆက်သွယ်ဖြစ်ခဲ့ကြပါတယ်။ဒါပေမယ့် ကျွန်မတို့က ဗုဒ္ဓဂယာမှာ မရှိတဲ့နေ့မှာ စင်္ကာပူမှ ညီမငယ်က ဗုဒ္ဓဂယာရောက် ၊လမ်းမကြီးပေါ်မှာ သွားနေကြတာတူပေမယ့် တစ်နေရာမှာဆုံနိုးနိုးဖုန်းနဲ့ အချိန်းအချက်လုပ်ခဲ့ကြတာ သူနဲ့ကျွန်မ မဆုံနိုင်ခဲ့ကြပါဘူး။အိန္ဒိယသွားတဲ့အခါ GSM လေးထည့်သွားရင် ဖုန်းကဒ်တစ်ကဒ်ကို ၈၀၀ ရူပီနဲ့ဝယ်သုံးနိုင်ပြီး မြန်မာပြည်နဲ့လည်း အဆက်အသွယ် ရနိုင်တာမို့ အဆင်ပြေပါတယ်။ကျွန်မကတော့ GSM ပါမသွားခဲ့တာမို့ အစ်မနန္ဒာကပဲ ကျွန်မကို GSM hand set တစ်လုံးပေးသုံးထားခဲ့ပြီး ဖုန်းကဒ်တစ်ကဒ်ကို ၈၀၀ ရူပီနဲ့ဝယ်ကာ မြန်မာပြည်မှ သမီးလေးထံ တစ်ရက်ခြား ဆက်သွယ်စကားပြောဖြစ်ခဲ့ပါတယ်။

တကယ်တော့ ကျွန်မခရီးသွားတဲ့ရက်က သမီးလေးစာမေးပွဲဖြေတဲ့ရက်နဲ့တိုက်နေခဲ့တာမို့ စဉ်းစားရခက်နေခဲ့ပြီး Facebook status မှာ ဗုဒ္ဓဂယာသို့ သွားသင့် မသွားသင့် message ရေးပြီး အကြံဥာဏ်တောင်းခဲ့တဲ့အခါ မိတ်ဆွေမောင်နှမများစွာက ဘာပဲဖြစ်ဖြစ် အခွင့်သင့်တုန်းသွားဖြစ်အောင်သွားဘို့ တိုက်တွန်းခဲ့ကြသလို ၊အစ်မနန္ဒာကလည်း စေတနာကောင်းစွာနဲ့ ဒီနှစ်မှာ နောက်ဆုံးအကြိမ်အဖြစ်သွားမှာမို့ ဆက်ဆက်လိုက်ခဲ့ဘို့ ခေါ်ပြန်တာရယ် ၊ဗုဒ္ဓဂယာမှ ဆရာတော်ကလည်း ဖုန်းဆက်လာပြီး "ဒကာမကြီး နေကောင်းတယ်မဟုတ်လား ၊ဒီတစ်ခေါက်လိုက်ဖြစ်မလား"လို့ ဖုန်းဆက်လာပြန်တာရယ်ကြောင့် အမြန်ဆုံးပတ်စ်ပို့ရအောင်စီစဉ်ကာ ကျန်တဲ့လိုအပ်တာတွေကို အစ်မနန္ဒာရုံးမှ အစ်မတစ်ယောက်က အစစအရာရာကူညီပေးခဲ့တာကြောင့် ဗုဒ္ဓဂယာသို့ခရီးထွက်ဖို့ အစစအရာရာ အဆင်ပြေသွားခဲ့ရပါတယ်။မဟုတ်ရင်တော့ သမီးလေးစာမေးပွဲရက်ကြီးဖြစ်တာမို့ မသွားတော့ပါဘူးလေ ၊ရောက်ဖို့ကံပါရင် နောက်တော့ရောက်အောင်သွားနိုင်ပါလိမ့်မယ်ဆိုပြီး စိတ်လျှော့ထားခဲ့တာပါ။ရောက်ဖို့ကံပါတော့လည်း အကြောင်းအကျိုးတိုက်ဆိုင်စွာနဲ့ ဗုဒ္ဓဂယာသို့ အရောက်သွားနိုင်ခဲ့ပါတယ်ရှင်။

ကျွန်မ ဗုဒ္ဓဂယာရောက်တော့ ကိုယ်တွေ့ကြုံရသမျှ အတွေ့အကြုံပီတိလေးတွေကို တခြားသူတွေထံချက်ခြင်းမျှဝေချင်ခဲ့တာပါ၊ကျွန်မပထမ စဉ်းစားမိတာက ဗုဒ္ဓဂယာသွားရင် net book ကလေးယူသွားပြီး နေ့စဉ် ခရီးစဉ်ဓါတ်ပုံလေးတွေနဲ့ စာလေးတွေတတ်နိုင်သလောက်ရေးပြီး ပို့စ်လေးတွေ မပြတ်တင်ပေးမယ် လို့စိတ်ကူးဖြစ်ခဲ့ပေမယ့် ပြန်စဉ်းစားကြည့်ခဲ့ပြန်တော့ ကျွန်မကဘာကြီးမှ မဟုတ်ပါပဲ ဘုရားဖူးတွေကြားမှာ ကွန်ပြူတာကြီး တကားကားနဲ့ဆိုရင် သူများတွေပြောစရာဖြစ်နေနိုင်သလို ၊ကော်နက်ရှင်မရရင် သယ်သွားတာ အလကားဖြစ်နိုင်တာကြောင့်ရယ်..နောက်ဆုံးတော့ အားလုံးကိုသံယောဇဉ်ဖြတ်ပြီးပဲ ဗုဒ္ဓဂယာသွားပါတော့မယ်လို့ ဆုံးဖြတ်ကာ ကွန်ပြူတာသယ်မသွားဖြစ်ခဲ့ပါဘူး။အဲဒါကို အခုမှ နောင်တရမိသလိုပါပဲ။ခရီးက ပြန်ရောက်ရင်ချင်း အချိန်ပေးကာ ခရီးသွားပို့စ်ကို အစ အဆုံးတခါတည်း ရေးနိုင်ခဲ့ရင်တော့ မမေ့မလျှော့ရေးနိုင်ဘို့ သေခြာပေမယ့် ၊အခုမှ ဆက်ရေးရတော့ ခရီးစဉ်တွေကို တော်တော်မေ့သွားပြီဖြစ်တာကြောင့် တဖက်က ဗုဒ္ဓဂယာမှာရိုက်လာတဲ့ဓါတ်ပုံတွေကို နေ့စွဲအလိုက်ကြည့်ဘို့ ကွန်ပြူတာ တစ်လုံးဖွင့် ၊တဖက်က စာရေးဘို့ကွန်ပြူတာတစ်လုံးဖွင့်၊နောက်ပြီး မှတ်သားထားခဲ့တဲ့စာအုပ် နဲ့ ဆရာတော်ထုတ်ဝေတဲ့စာအုပ်တွေကို ကိုးကားရေးနိုင်ဘို့ စာပွဲပေါ်မှာ စာအုပ်တွေနဲ့ ကွန်ပြူတာ ၂လုံးပြည့်နေခဲ့တာကြောင့် ကိုယ်တိုင်က ဘာမှမဟုတ်ပဲ စာရေးဆရာလိုလို ၊ဘာလိုလို ညာလိုလိုပုံစံဖြစ်နေတာကြောင့် ကိုယ့်ကိုကိုယ် ရယ်မိပါသေးတယ်။တကယ်လည်း ကျွန်မက စာဖတ်သူမိတ်ဆွေမောင်နှမတွေကို ကျွန်မသွားခဲ့တဲ့ ခရီးစဉ် အစ အဆုံးကို သေခြာရေးကာ မျှဝေချင်တာပါ။ဗုဒ္ဓဂယာပို့စ်လေးနဲ့ပတ်သက်ပြီး စောင့်ဖတ်နေတဲ့သူတွေ ၊ခရီးစဉ်ကုန်ကျစရိတ်မေးမြန်းခဲ့တဲ့မောင်နှမတွေကို အမြန်ဆုံးပြောပြ ရေးပြချင်နေတဲ့စိတ်က ရင်ထဲမှာရှိနေခဲ့ပါတယ်။အကြောင်းကြောင်းတွေနဲ့အလုပ်များကာ စာရေးဘို့ အာရုံရမနေတာကြောင့် အချိန်အရမ်းကြာသွားခဲ့တာကိုတောင်းပန်မိပါတယ်ရှင်။

ဖေဖော်ဝါရီလ ၁၆ ရက်နေ့မနက်စောစော မိဂဒါဝုန်ဘုန်းကြီးကျောင်းမှထွက်လာကြပြီး ညနေပိုင်းမှာ သင်္ကဿနဂိုလ်ပြည်သို့ရောက်ရှိကာ သင်္ကဿနဂိုလ်ပြည် မြန်မာဘုန်းတော်ကြီးကျောင်းမှာ တည်းခိုခဲ့ကြပြီး ကျောင်းထိုင်ဆရာတော်အား လှူဘွယ်ဝတ္ထုအစုစုတို့ဖြင့် လှူဒါန်းပူဇော်ကြကာ ကုသိုလ်ယူခဲ့ကြပါတယ်။သင်္ကဿနဂိုလ်ပြည်သည် မြတ်စွာဘုရားရှင်ကိုယ်တော်မြတ်ကြီး တာဝတိံသာနတ်ပြည်၌ ၀ါကပ်ဆိုတော်မူပြီးနောက် လူ့ပြည်သို့ဆင်းသက်တော်မူသောအခါ အစပထမလက်ယာခြေတော်ချခဲ့သောနေရာ ဖြစ်ပြီး ၊ မြတ်စွာဘုရားဟောကြားတော်မူခဲ့သော ပဌာန်းဒေသနာတော်ကြီးကို အရှင်သာရိပုတ္တရာမှ နာကြားကာ သင်္ကဿနဂိုလ်ပြည်တွင် အတူနေရဟန်းတော် ၅၀၀တို့အား ဟောကြားခဲ့သောနေရာလည်ဖြစ်ပါသည်။ကျွန်မတို့သည် သင်္ကဿနဂိုလ်ပြည်ရှိ ပဌာန်းဒေသနာတော်ဟောကြားခဲ့သောတောင်ကုန်းလေးတွင် ပဌာန်းဒေသနာတော်ကြီးကို ပြိုင်တူရွတ်ဆိုပူဇော်ကာ ကုသိုလ်ယူခဲ့ကြပါသည်။ကျွန်မတို့ သွားခဲ့တဲ့ ၂ လပိုင်း ဗုဒ္ဓဂယာခရီးစဉ်အချိန်ဟာ ရာသီဥတုက အရမ်းလည်းမပူ ၊အရမ်းလည်းမအေးတာကြောင့် ရာသီဥတု အကောင်းဆုံးအချိန်လို့ သတ်မှတ်ကြပေမယ့် ပဌာန်းဒေသနာတော်ရွတ်ဖတ်ခဲ့တဲ့ ကုန်းတော်လေးသို့ရောက်ကြတဲ့အချိန်မှာ လေအေးတွေတိုက်ပြီး အလွန်အေးခဲ့တာကြောင့် အစ်မနန္ဒာမှ အသင့်ယူဆောင်လာခဲ့သော အလှူရှင်တစ်ဦးမှလှူဒါန်းထာတဲ့ ခေါင်းစွပ်ဦးထုတ်တွေကို ဘုရားဖူးတွေအားလုံးကို ဝေပေးခဲ့တဲ့အခါ ဘုရားဖူးတွေအတွက် အဆင်ပြေသွားခဲ့ရပါတယ်။

ရှာဂျာဟန်နန်းတော် ( တပ်ခ်ျမဟာ)

ဖေဖော်ဝါရီလ ၁၇ ရက် မနက်မှာတော့ သင်္ကဿနဂိုလ်ပြည်မှသည် တပ်ခ်ျမဟာသို့ ခရီးဆက်ခဲ့ကြပြီး ဘုရင်ရှာဂျာဟန် နန်းတော်သို့ အလည်ပို့ပေးခဲ့ပါတယ်ရှင်။ဘုရင်ရှာဂျာဟန်နဲ့ မိဘုရားအကြောင်းကို ဆရာတော်မှ ရှင်းပြပေးတဲ့အခါ စိတ်ဝင်စားစရာအလွန်ကောင်းပြီး စာဖတ်သူတွေကိုလည်း ကျွန်မမှတ်မိသလောက် မျှဝေပေးလိုပါတယ်။ဘုရင်ရှာဂျာဟန်သည် မိဘုရားဖြစ်သူ ဘက်ဂုမာမာတာ ဘုရင်မအားအလွန်ချစ်မြတ်နိုးပြီး မိဘုရားကြီးကွယ်လွန်သွားသောအခါ ကွန်လွန်သူမိဘုရား၏ ရုပ်အလောင်းကို နေ့စဉ်မိမိနေထိုင်ရာ ရှာဂျာဟန်နန်းတော်မှ လွမ်းဆွတ်သတစွာဖြင့် အမြဲကြည့်နေနိုင်ရန် အတွက် အလွန်ခမ်းနားထည်ဝါလှသော နန်းတော်ကြီးတစ်ခုကို ရှာဂျာဟန်နန်းတော်၏ အရှေ့ဘက်တည့်တည့်တွင် အမှတ်တရအဖြစ် တည်ဆောက်ခဲ့ခြင်းဖြစ်ပါသည်။ဘက်ဂုမာမာတာ ဘုရင်မ၏ ရုပ်အလောင်းကို အလွန်ခမ်းနားထည်ဝါလွန်းလှသော နန်းတော်အဆောက်အဦးကြီးအဖြစ် အနုစိတ်မွမ်းမံကာတည်ဆောက်ခဲ့သဖြင့် နိုင်ငံတကာမှ ခရီးသွားများသည် ဘက်ဂုမာမာတာမိဘုရားနန်တော်သို့ နေ့စဉ် ထူးထူးကဲကဲစည်ကားစွာ လာရောက်ကြည့်ရှု့လျှက်ရှိနေကြပါသောကြောင့် တပ်ခ်ျမဟာမြို့မှ ရရှိသောဝင်ကြေးငွေများဖြင့် အိန္ဒိယနိုင်ငံ၏ ၀င်ငွေသည် အလွန်များလိမ့်မည်ဟု ကောက်ချက်ချမိပါတယ်။ဘုရင်ရှာဂျာဟန် ကွယ်လွန်တဲ့အခါမှာလည်း ဘုရင်မ ဘက်ဂုမာမာတာရဲ့ ရုပ်အလောင်းနဲ့အတူ ဘက်ဂုမာမာတာနန်းတော်ကြီးထဲမှာ ဘေးချင်းယှဉ်ပြီး ဂူသွင်းထားတာကြောင့် အဲဒီအုတ်ဂူနှစ်ဂူကိုကြည့်ဘို့ရန်အတွက် ခမ်းနားထည်ဝါလွန်းတဲ့နန်းတော်ကြီးကို လူအများလာရောက်ကြည့်ရှုနေကြခြင်းသာဖြစ်ပါတယ်။ဘက်ဂုမာမာတာ နန်းတော်ကြီးဟာ ယမုံနာမြစ်ကမ်းနဘေးမှာ တည်ရှိနေတာကြောင့် စာထဲမှာသာဖတ်ဖူးခဲ့တဲ့ ယမုံနာဖြစ်ကို နောက်ခံပြုပြီး ကျွန်မတို့ဓါတ်ပုံတွေအများကြီးရိုက်ဖြစ်ခဲ့ကြပါတယ်။

တပ်ခ်ျမဟာ ၊ဘက်ဂုမမာတာ နန်းတော်ကြီး

ညဘက်မှာတော့ တပ်ခ်ျမဟာမြို့ Hotel Mandakini VILLAS နဲ့ ALPINE HOTEL တို့တွင် တည်းခိုနိုင်ကြစေရန် အစ်မနန္ဒာမှ စီစဉ်ပေးခဲ့ပါတယ်။ကျွန်မတို့အဖွဲ့မှာ လူပေါင်း ၆၀ ကျော်ဖြစ်တာကြောင့် ဟိုတယ်တစ်ခုတည်းမှာ အဆင်မပြေပဲ နှစ်ဖွဲ့ခွဲပြီး ဟိုတယ်နှစ်ခုမှာ တည်းခိုခဲ့ကြခြင်းဖြစ်ပါတယ်။Dinner အတွက်ကိုတော့ အိန္ဒိယစားသောက်ဆိုင်မှာ အိန္ဒိယအစားအစာ နဲ့ မလိုင်များစားသုံးစေခဲ့တာကြောင့် အိန္ဒိယရောက်တုန်း အိန္ဒိယအစားအစာကို စားဖြစ်ခဲ့တဲ့အတွက် အရမ်းမကြိုက်ပါသော်လည်း မိမိအလည်ရောက်ရှိတဲ့နိုင်ငံရဲ့ အစားအစာကို စားသောက်ခွင့်ရတဲ့အတွက် စိတ်ကျေနပ်စရာအမှတ်တရတစ်ခု ဖြစ်ခဲ့ရပါတယ်ရှင်။

၁၈ ရက်နေ့မနက်ပိုင်းမှာတော့ ၁၇ ရက်နေ့က အပြင်ကသာမြင်ခဲ့ရတဲ့ ဘုရင်ရှာဂျာဟန်နန်းတော်ကြီးထဲသို့ အလည်ဝင်ရောက်ခဲ့ကြပြီး နယူးဒေလီမြို့သို့ ခရီးဆက်ခဲ့ကြပါတယ်။အိန္ဒိယနိုင်ငံရဲ့လူနေမှုစရိုက်ကို ကျွန်မကြုံခဲ့ရသလောက် အနည်းငယ်ပြောပြရမယ်ဆိုရင် သူတို့နိုင်ငံသူ၊နိူင်ငံသားတွေဟာ အပေါ့အလေးသွားမယ်ဆိုရင် နေရာမရှောင်သွားတတ်ကြပါတယ်။ကားလမ်းမကြီးဘေးမှာ မတ်တပ်ရပ်ပြီး မရှက်မကြောက်အပေါ့သွားနေသူတွေကို ကားပေါ်ကနေ မကြာခဏတွေ့ခဲ့ရသလို ကျွန်မတို့ ဗုဒ္ဓဂယာဘုရားဖူ ခရီးသည်တွေမှာလည်း အိန္ဒိယနိုင်ငံရဲ့လမ်းခရီးတွေမှာ အိမ်သာလုံးဝ မရှိသလောက်ဖြစ်တဲ့အတွက် ခရီးစဉ်တစ်လျှောက် လမ်းတွေမှာ အဆင်ပြေသလို လမ်းဘေးရပ်ပြီး အပေါ့သွားခဲ့ရတာလေးကတော့ အမှတ်ရစရာလေးတစ်ခု ဖြစ်နေခဲ့ပါတယ်။အဲဒီလိုလမ်းဘေးမှာ ကားရပ်ပြီး အပေါ့သွားရင် နေရာမရှောင် အပေါ့အလေးသွားတတ်ကြတဲ့ သူတို့တွေရဲ့ ထောင်ချောက်မိုင်းတွေကို တက်မနင်းမိအောင် ရှောင်ကြရတာကလည်း အမှတ်ရစရာ တစ်ခုပါပဲ။ ပထမ တစ်ရက် နှစ်ရက်လောက်ကတော့ ကျွန်မအနေနဲ့လည်း အခြားဘုရားဖူးများနည်းတူ စိတ်ညစ်မိပေမယ့် ကြာလာတော့လည်း ဒီလောက်ဒုက္ခလောက်ကတော့ စာမဖွဲ့လောက်ပါဘူး၊ မြတ်စွာဘုရားရှင်တောင်မှ ဒီခရီးကို ရထားမပါ ၊ကားမပါပဲ ဒုက္ခများစွာခံကာ ခြေလျှင်ကြွမြန်းနိုင်ခဲ့သေးတာ ကျွန်မတို့ကမှ စီးစရာကား ၊သောက်စရာရေ ၊စားစရာ အစာအပြည့်အစုံနဲ့ လိုလေသေးမရှိ ပြီးပြည့်စုံစွာ သွားလာနိုင်ကြတာကြောင့် စိတ်ညစ်စရာကို စိတ်ညစ်စရာလို့ မမြင်တော့ပဲ မြတ်စွာဘုရားရှင်လက်ထက်ကိုတွေးပြီး စိတ်ထားတတ်သွားတဲ့အခါ မိုင်းရှောင်ရတဲ့ကိစ္စလောက်ကတော့ အသေးအမွှားပြဿနာလေးဖြစ်သွားခဲ့ပါတော့တယ်။

မြန်မာပြည်မှာတုန်းက ကျွန်မမှ အစ်မနန္ဒာကို "ခရီးသွားရမှာမို့ ဘောင်းဘီရှည်တွေဝတ်ရင်အဆင်ပြေနိုင်မလား"လို့ မေးတဲ့အခါ အစ်မနန္ဒာက "တစ်နေကုန်ခရီးထွက်ပြီး လမ်းတစ်လျှောက် အဆင်ပြေသလို အပေါ့သွားကြရတာကြောင့် ထမီလေးတွေနဲ့ဆိုရင် ပိုအဆင်ပြေကြောင်း"ပြောပြခဲ့ပေမယ့် ထမီဝတ်ရတာ သိတ်အချိုးမကျတတ်တဲ့ကျွန်မက ယောဂီထမီ အနည်းငယ်သာယူဆောင်ပြီး ဘောင်းဘီရှည်တွေကို ၄ ၊၅ ထည်ယူဆောင်သွားခဲ့မိပါတယ်။ကျွန်မကတော့ ခရီးစဉ်တလျှောက် ကားပေါ်တက်ရဆင်းရလွယ်ကူအောင် ဘောင်းဘီရှည်နဲ့အတူ ကုဒ်အကျီ င်္ရှည်ကြီးတွေ အမြဲဝတ်ခဲ့တာမို့ ကျွန်မအတွက်တော့ အဆင်ပြေခဲ့ရပါတယ်လို့ ဆိုနိုင်ပါတယ်။ဘယ်လိုအဆင်ပြေသလဲဆိုတာကိုတော့  အသေးစိတ်ပြောမပြလိုတော့ပါဘူးနော်။ ခရီးသွားရင်း ဘောင်းဘီရှည်ဝတ်ချင်ရင် ကုတ်အကျီ င်္ရှည်ကြီးတွေ ဆောင်သွားကြဘို့ မမေ့ကြပါနဲ့လို့ ပြောထားပါရစေနော်။

နယူးဒေလီ ၊ANANDA HOTEL

ခရီးသွားရင်း ကျွန်မအတွေ့အကြုံရလာခဲ့တာကတော့ ဘောင်းဘီရှည်ထက်ကို ပိုပြီး အဆင်ပြေနိုင်တဲ့ အသက်ကြီးသူတွေရော ၊အသက်ငယ်သူ ဘုရားဖူးတွေရော တော်တော်များများဝတ်ကြတဲ့ ဆွဲသားစကဒ်ရှည်လေးတွေကို မဖြစ်မနေ အနည်းဆုံး ၃၊၄ ထည်စီဝယ်သွားကြဘို့ အကြံပေးလိုပါတယ်ရှင်။အခု ထမီပုံစံ ဆွဲသားစကဒ်ရှည်တွေ ခေတ်စားနေတာကြောင့် အဲဒီဆွဲသားစကဒ်ရှည်တွေကို ယောဂီရောင်တွေဝယ်နိုင်ကြသလို ၊အညိုပွင့် ဒီဇိုင်းပေါင်းစုံ ၀ယ်နိုင် ၀တ်နိုင်ကြတာမို့ ကားပေါ်တက်ရ ဆင်းရ ခရီးရှည်ဆက်ရတဲ့ ဘုရားဖူးတွေအတွက် တော်တော်လေးအဆင်ပြေတယ်လို့ ပြောကြပါတယ်။ကျွန်မကတော့ မသိလိုက်တဲ့အတွက် ဆွဲသားစကဒ်ရှည်ကလေးတွေ ၀ယ်မသွားဖြစ်ခဲ့ပါဘူး။စကဒ်ရှည်လေးတွေဝတ်ထားရင် ထမီလေးတွေဝတ်ထားသလို ထင်ရပြီး ၊ထမီလို ကျွတ်မကျနိုင်တာမို့ အသက်ကြီးတဲ့သူတွေအတွက်လည်း တော်တော်လေးအဆင်ပြေသလို အပေါ့အပါးသွားရင်လည်း တကယ်လွယ်ကူနိုင်တာကြောင့် ဗုဒ္ဓဂယာဘုရားဖူးခရီးသွားကြမယ်ဆိုရင်ဖြင့် ကိုးရီးယားဆွဲသားစကဒ်ရှည်လေးတွေကို မဖြစ်မနေ၀ယ်သွားကြဘို့ အကြံပေးလိုပါတယ်။

ကြားဖြတ်အစီအစဉ်တွေပြောနေရလို့ ခရီးစဉ်အကြောင်းပြန်ဆက်ပါရစေရှင်။ဒီလိုနဲ့ ကျွန်မတို့ဘုရားဖူးအဖွဲ့ဟာ အိန္ဒိယနိုင်ငံရဲ့မြို့တော် နယူးဒေလီမြို့သို့ ခရီးစတင်ခဲ့ကြရာမှာ ကားသမားလေး ပကပ်ခ်ျပြောတဲ့အတိုင်း many many problem ဆိုတဲ့ ပြဿနာစပြန်တော့တာပါပဲ။သူပြောတာက "အခု အလွန်ကြီးတဲ့မြို့ကြီးကိုသွားနေပါပြီ ၊ လူတွေ ကားတွေ အရမ်းထူထပ်တာမို့ အချိန်အများကြီးကြာမှာဖြစ်တာကြောင့် many many problem ပါတဲ့။အဲဒီတော့ ကျွန်မတို့က ပြောပြန်ပြီ many many problem လို့ သတိပေးတဲ့အခါမှာတော့ မျက်နှာပြုံးပြုံးနဲ့ sorry sorry တဲ့လေ။စောစောက ကျွန်မပြောခဲ့သလို အိန္ဒိယလူမျိုးတွေတွေ့ရာနရာမရှောင် အပေါ့အပါးသွားတတ်ကြောင်းကို နယူးဒေလီမြို့ဝင်စမှာကတည်းက သက်သေပြလိုက်တော့တာပါပဲ။အိန္ဒိယနိုင်ငံရဲ့မြို့တော်ကြီးဖြစ်ပေမယ့် မြို့အ၀င်ကစပြီး သေးနံ့နဲ့ကြိုဆိုလိုက်တာ တော်တော်နဲ့ အနံ့မပျောက်နိုင်တော့ပါဘူး။မြို့အ၀င်မှာ ကားတွေက အရမ်းကျပ်ပိတ်ထူထပ်နေပြီး ဖြေးဖြေးချင်း မောင်းခဲ့ကြတာမို့ တည်းခိုမယ့်ဟိုတယ်လ်ကို ညမိုးချုပ်မှပဲ ရောက်နိုင်ခဲ့ပါတော့တယ်။ကျွန်မတို့အားလုံး နယူးဒေလီမြို့ ANANDA HOTEL မှာ တည်းခိုခဲ့ကြပြီး ညစာကို ဟိုတယ်မှာပဲ စားသောက်ဖြစ်ခဲ့ကြပါတယ်။

၁၉ ရက်နေ့မှာတော့ မြတ်စွာဘုရား မဟာသတိပဌာန်သုတ္တန် ဟောကြားတော်မူရာ ကုရုတိုင်း(နယူးဒေလီ)သို့ ရောက်ရှိခဲ့ကြပြီး ဆရာတော်ဟောကြားတော်မူသော တရားတော်များကို မှတ်သားနာယူနိုင်ခဲ့ကြပါသည်။နေ့လည်စာကိုတော့ နယူးဒေလီမြို့ရဲ့ စားသောက်ဆိုင်မှာ တရုတ်ဟင်းလျာများနဲ့ သုံးဆောင်စေခဲ့တာကြောင့် စားပွဲထိုးတွေက ထမင်းတွေဟင်းတွေ ချပေးတာနဲ့ ကျွန်မတို့တွေ ဗိုက်ဆာဆာနဲ့စားလိုက်ကြတဲ့အခါ ခဏတွင်းပဲ ပြောင်ရှင်းသွားအောင် စားနိုင်ခဲ့ကြတာမို့ "ကုလားတွေတော့ မြန်မာလူမျိုးတွေကို အံ့သြတော့မှာပဲ"လို့ ရယ်စရာပြောဖြစ်ခဲ့ကြပါသေးတယ်။နေ့လည်စာ စားသောက်အပြီးမှာ Shopping ထွက်ချိန်ဆိုပြီး အချိန် ၃ နာရီလောက်ပေးကာ Ansal Plaza ကြီးသို့လိုက်ပိုပေးခဲ့ပါတယ်။Ansal Plaza ဆိုတာ Shopping center အကြီးကြီးဖြစ်ပြီး မြန်မာပြည်အတွက် လက်ဆောင်လေးတွေပေးဘို့ ၀ယ်နိုင်ကြပါတယ်။မှတ်မှတ်ရရ Ansal Plaza မှာ မေမေနဲ့ကျွန်မနှစ်ယောက်အတူ ဆိုင်တွေကိုပတ်ကြည့်နေကြတုန်း ဖုန်းသံကြားလို့ အိတ်ထဲကနေ ဖုန်းကိုဆွဲထုတ်လိုက်ရာမှာ ဖုန်းလို့ထင်တဲ့အရာက ရေမွှေးပုလင်းဖြစ်နေခဲ့ပြီး ကျွန်မမထင်မှတ်စဉ်အချိန်ကလေးအတွင်းမှာပဲ ကိုင်မိထားတဲ့အဖုံးက ကျွတ်ကျကာ သံမံသလင်းပေါ် ပုလင်းပြုတ်ကျပြီး "ခွမ်" ကနဲ့ ကွဲသွားခဲ့တာကြောင့် ဂျပန်မှ ညီမလေးတစ်ဦးလက်ဆောင်ပေးထားတဲ့ Elizabeth Arden ရေမွှေးပုလင်းကလေးကို နှမျောသတစွာနဲ့ ဖန်ကွဲစလေးတွေကိုကောက်ကာ အမှိုက်ပုံးထဲထည့်ခဲ့လိုက်ရပါတယ်။

Ansal Plaza ရှေ့မှာ အမှတ်တရ.

Ansal Plaza မှာ ဦးဥာဏ်အတွက် ရှပ်အကျီ င်္တစ်ထည်လက်ဆောင်ဝယ်ခဲ့ပြီး မစားရတာကြာပြီဖြစ်တဲ့ Mc Donald ဆိုင်ကိုတွေ့တော့ ကျွန်မစားချင်နေတဲ့ ပုဇွန်ဟန်ဘာဂါများရှိမလားရယ်လို့ မေးကြည့်တော့ ရှိမနေပါဘူး အမဲသားနဲ့ ကြက်သားဘာဂါတွေပဲ ရပါတယ်။အဲဒါနဲ့ ကဖေးမိုချလေးတစ်ယောက်တစ်ခွက်မှာပြီး အာလူးကြော်နဲ့စားကြတာ ရူပီ ၈၀ လောက်ပဲကျပါတယ်။

ရူပီနဲ့ ဒေါ်လာငွေလဲလှယ်နှုန်းကတော့ ကျွန်မတို့သွားစဉ်အချိန်က အစ်မနန္ဒာက ဒေါ်လာ ၁၀၀ ကို ၄၅၀၀ ရူပီနဲ့ လဲပေးခဲ့ပါတယ်။

လေးစားစွာဖြင့်

ဝါ၀ါခိုင်မင်း